“Un o’r pethau mwyaf calonogol oedd gweld Pwllheli yn llawn bywyd. Roedd y dref yn fwrlwm o bobl drwy gydol y dydd, gyda’r ŵyl yn denu ymwelwyr o bob rhan o’r ardal a thu hwnt. Roedd yn amlwg bod y digwyddiad nid yn unig yn cefnogi’r stondinwyr, ond hefyd yn dod â budd ehangach i fusnesau lleol ac yn arddangos Pwllheli ar ei orau.”
-Jane Watkinson, Cadeirydd Gwyl Fwyd Llyn.
Eleni, cafwyd dathliad arbennig iawn ym Mhen Llŷn wrth i’r Ŵyl Fwyd gyntaf erioed agor ei drysau, gan groesawu miloedd o ymwelwyr i ymuno mewn diwrnod llawn blas, hwyl ac egni cymunedol. Roedd yn gyfle gwych i ddathlu talent, creadigrwydd a chynnyrch lleol yr ardal, ac roedd hi’n fraint i GwyrddNi fod yn rhan o’r achlysur cofiadwy hwn.
Gyda’r haul yn tywynnu, arogl bwyd blasus yn llenwi’r awyr a’r maes yn llawn bywyd a sŵn sgyrsiau hapus, roedd awyrgylch arbennig iawn i’w deimlo. Croesawyd ymwelwyr i stondin GwyrddNi drwy gydol y dydd, gan greu cyfle i rannu gwybodaeth am ein gwaith, trafod syniadau cymunedol a chreu cysylltiadau newydd gyda phobl sy’n rhannu’r un angerdd dros ddyfodol cynaliadwy a chryf i Ben Llŷn.
Roedd stondin GwyrddNi yn ganolbwynt cynnes a chroesawgar yng nghanol yr ŵyl, gyda choffi a chacennau blasus yn denu pobl draw am sgwrs a chyfle i ymlacio. Roedd Dafydd, Hwylusydd Pen Llŷn, ar y stondin yn rhannu mwy am waith GwyrddNi, tra hefyd yn croesawu Martyn Croydon o Hwb Cymraeg Dwyfor i gyd-gynnal sesiwn arbennig Paned i’r Blaned. Roedd hi hefyd yn braf cael cwmni Seimon, a fu’n arddangos ei fap digidol o gynnyrch lleol Llŷn – adnodd gwych i godi ymwybyddiaeth o’r hyn sydd gan yr ardal i’w gynnig.
Gyda baneri lliwgar, addurniadau deniadol a nifer o weithgareddau diddorol ar gael, roedd rhywbeth i bawb ddod draw i’w fwynhau. Roedd y stondin yn lle perffaith i stopio, cael sgwrs, dysgu rhywbeth newydd a rhannu syniadau am sut gallwn ni barhau i gefnogi ein cymuned leol.
Paned i’r Blaned – Sgyrsiau Dros Baned a Chacen.
Un o uchafbwyntiau’r diwrnod oedd sesiwn lwyddiannus iawn Paned i’r Blaned. Gyda phawb yn mwynhau paned boeth a chacen ffres, cafwyd cyfle i drafod pynciau oedd yn cyd-fynd yn berffaith â thema’r ŵyl – bwyd, cynnyrch lleol a’r Gymraeg.
Roedd y sgyrsiau’n llawn egni a brwdfrydedd, gyda phobl yn rhannu eu hoff brydau lleol, eu hoff ddanteithion a’u profiadau o’r bwydydd amrywiol oedd ar gael ar draws yr ŵyl. Yn ogystal â mwynhau trafodaethau diddorol, dysgwyd termau Cymraeg newydd a defnyddiol fel “byrbryd” a “bwydlen”, gan ychwanegu elfen hwyliog ac addysgiadol i’r sesiwn.
Roedd yn arbennig o braf gweld nifer o ddysgwyr Cymraeg yn ymuno, gan roi cyfle iddynt ymarfer eu sgiliau, magu hyder a mwynhau sgwrsio gyda’i gilydd mewn awyrgylch hamddenol a chefnogol. Mae Paned i’r Blaned yn cynnig lle cynnes lle gall pobl ddod at ei gilydd i drafod materion pwysig, rhannu profiadau a defnyddio’r Gymraeg mewn ffordd naturiol bob dydd.
Roedd hefyd yn hyfryd gweld rhai o fynychwyr blaenorol y sesiynau yn dod o hyd i stondin GwyrddNi ar y maes a chymryd rhan unwaith eto – arwydd gwych o’r cysylltiadau a’r gymuned sy’n parhau i dyfu o gwmpas y sesiynau hyn.
Diolch enfawr i bawb a ddaeth draw i’n gweld ni, i rannu sgwrs ac i fod yn rhan o ddiwrnod mor arbennig. Roedd Gŵyl Fwyd Pen Llyn yn ddathliad gwych o bopeth sy’n gwneud yr ardal mor unigryw – pobl, bwyd, diwylliant a chymuned.
Addewidion Bach i greu Newidiadau Mawr:
Yn ogystal â’r holl sgyrsiau a gweithgareddau ar y stondin, cynhaliwyd gweithgaredd arbennig ‘Addewid i Ben Llŷn’, a roddodd gyfle i ymwelwyr feddwl yn greadigol am sut gallwn ni i gyd gyfrannu at ddyfodol mwy cynaliadwy, glanach ac eco-gyfeillgar i’r ardal.
Roedd yn weithgaredd hwyliog a chynhwysol i bawb – o blant a theuluoedd i ddysgwyr a thrigolion lleol – gan wahodd pawb i wneud un addewid bach ond ystyrlon dros Ben Llŷn. Roedd hi’n hyfryd gweld cymaint o bobl yn rhannu eu syniadau, eu gobeithion a’u hymrwymiad i ofalu am yr ardal arbennig hon.
Cafwyd nifer fawr o addewidion calonogol, gan ddangos pa mor gryf yw’r awydd ymhlith y gymuned i warchod harddwch naturiol Pen Llŷn a chreu dyfodol mwy gwyrdd i bawb. Roedd pob addewid yn adlewyrchu’r gofal a’r cariad sydd gan bobl tuag at yr ardal maent yn ei galw’n gartref – neu’r lle maent wedi dod i’w fwynhau.
Roedd yn arbennig o braf gweld ymwelwyr oedd ar wyliau yn cymryd rhan hefyd. Er nad oeddent yn byw’n lleol, roeddent wedi’u swyno gan harddwch Pen Llŷn, ei thirweddau unigryw a’r croeso cynnes a’r teimlad cryf o gymuned sydd i’w deimlo ledled yr ardal. Roedd eu parodrwydd i wneud addewid yn dangos bod cariad at Ben Llŷn yn ymestyn ymhell y tu hwnt i’w ffiniau.
Cysylltiadau Newydd, Gweledigaethau Cyffredin a Chymuned sy’n Tyfu:
Roedd hi’n deimlad gwirioneddol arbennig ac yn fraint cael cyfarfod ac ymgysylltu â chymaint o bobl newydd drwy gydol y diwrnod. Roedd gweld unigolion o bob cefndir yn dod at y stondin, yn rhannu eu syniadau ac yn dangos yr un angerdd a gweledigaeth tuag at ddyfodol Pen Llŷn yn hynod ysbrydoledig.
Mae sgyrsiau gyda phobl newydd bob amser yn dod â safbwyntiau ffres a syniadau gwerthfawr. Roedd gwrando ar brofiadau, barn a syniadau gwahanol yn ein hatgoffa o gryfder cymuned a bod pawb yn dod â rhywbeth unigryw i’r bwrdd. Mae’r cysylltiadau hyn yn ein helpu i barhau i ddatblygu GwyrddNi mewn ffordd sy’n adlewyrchu anghenion, gobeithion a syniadau’r gymuned. Trwy wrando, cydweithio a chreu lle i bawb gyfrannu, gallwn sicrhau bod ein gwaith yn parhau i fod yn berthnasol ac yn gynhwysol i bawb ym Mhen Llŷn.
Edrychwn ymlaen yn fawr at groesawu’r holl wynebau newydd a ddaeth i gysylltiad â ni yn ystod yr ŵyl i’n digwyddiadau yn y dyfodol.
Dyma olwg ar rhai o’r Addewidion gan drigolion ardal Pen Llŷn!
• Dwi’n mynd i brynu’n fwy lleol ac osgoi’r archfarchnad.
• I promise to save water by not letting the tap run, only boiling enough water for tea and saving rain water.
• Tyfu mwy o goed – a bwyta’n lleol!
• Dwi’n gaddo hel sbwriel pan yn mynd am dro.
• Dwi’n addo cefnogi trafnidiaeth werdd.
• Dwi’n gaddo ailgylchu yn gywir a defnyddio llai o blastig.
“Roedd hi’n wych gweld pobl o bob oed yn cymryd rhan ac yn mwynhau’r diwrnod gyda’i gilydd. O deuluoedd ifanc i drigolion hŷn, roedd rhywbeth at ddant pawb, ac roedd yr haul braf yn ychwanegu at yr awyrgylch arbennig. Roedd gweld y gymuned gyfan yn dod ynghyd i fwynhau bwyd lleol, adloniant a chwmni da yn dangos yn union beth mae Gŵyl Fwyd Llŷn yn ei olygu.
Hoffwn ddiolch yn arbennig i’r gwirfoddolwyr, perfformwyr, noddwyr, partneriaid, stondinwyr a phawb a fynychodd y digwyddiad. Heb eu cefnogaeth a’u hymrwymiad, ni fyddai’r ŵyl yn bosibl. Rydym eisoes yn edrych ymlaen at adeiladu ar lwyddiant eleni a chroesawu pawb yn ôl y flwyddyn nesaf.”
-Jane Watkinson, Cadeirydd Gwyl Fwyd Llyn.